| chobenalla aragonesista

Chobenalla ye una organizazión chobenil sozialista y aragonesa que naxe en 1992, á radiz d’as mobilizazions per l’autonomía plena e cuentra o trescol d’o Ebro, que se parón per ixas añadas en o nuestro país. As nuestras ordinazions enfilan os ocheutibos de Chobenalla enta lo treballo ta plegar á la independenzia d’Aragón asinas como á la reconoxedura d’os dreitos nazionals e sozials d’o Pueblo aragonés en cualsiquier organo entrenazional, apostando per una republica laica aragonesa estruturada en una federazión de redoladas. Asinas mesmo, luitamos per a identidad cultural aragonesa, per a solidaridá entrenazionalista,  per o feminismo y per  un mundo más sostenible (sozial y meyoambientalmén), pacifista e igualitario. Tamién, dende un proyeuto chobenil autonomo, luitamos per os dreitos d’as y os chobens aragoneses, desixindo puliticas laborals, educatibas, sozials e de bibienda que premitan a nuestra emanzipazión reyal en a soziedá.

En consecuenzia d’istos ocheutibos o funzionamiento interno e as aizions esternas asemellan línias de chestión e tomas de dezisión orizontals e asambleyarias, codezisión e democrazia direuta e partezipatiba. O treballo de Chobenalla se para dende as collas territorials (Ligallos de Redolada), con autonomía de dezisión en as suyas competenzias, dica plegar á la echecutiba nazional (Maya Nazional), an i son ripresentatos os territorios e bi ha unas dembas echecutibas (Bocaliyas) ta lo funzionamiento global (como d’autos e campanyas, rilazions entrenazionals, rilazions soziopuliticas), tot iste treballo cordinato per a fegura d’o Cordinador Nazional. As autibidaz de Chobenalla no son cambeato muito dende a suya fundazión: luita en a carrera, partezipazión en foros alternatibos (antimelitars, feministas, ecoloxistas), tamién en foros más enstituzionals (Consello d’a Chobentú de Zaragoza, Consello Nazional d’a Chobentú d’Aragón), igualmén enformar á os chobens (charradas, ziclos seutorials), conziertos rebindicatibos (Acampada Choben d’Artieda, Trobada per una Nueba Cultura de l’Augua), refirmar autos con atrás organizazions nazionalistas perifericas (presenzia en a European Free Alliance Youth), etz. E profés treballar t’amillorar o camín d’o nuestro Pueblo. Ta ixo creyemos nesezario a codesión d’o aragonesismo, como bía ta plegar a emanzipazión nazional. En o primer puesto, fortalexendo e treballando con a zurda nazional á ran chobenil. Més dillá, a partir d’a Xarxa Sozial Aragonesa, o conchunto d’organizazions sozials que treballan per Aragón dende esferens dembas (pulitico, sendical, ecoloxista, feminismo, atraglobalizazión, ozio...).

Queremos e podemos construyir, como diz o lema d’a nuestra zaguera Asambleya Nazional –Zaragoza, Febrero de 2006- “Un país libre an bastir o sozialismo”).